2025-11-10 14:39:52
- 2025-11-03
- By Admin
УИХ-ын гишүүн С.Цэнгүүн Шинжлэх ухааны паркийн захиргаанд зочилж, инновацын экосистемийн асуудлаар санал солилцлоо
Өнөөдөр УИХ-ын гишүүн С.Цэнгүүн Шинжлэх ухааны паркийн захиргаанд зочлон, байгууллагын үйл ажиллагаа, шинжлэх ухаан, инновацын экосистемийг хөгжүүлэх чиглэлээр хэрэгжүүлж буй бодлого, ажлын явцтай танилцлаа.
Уулзалтын үеэр талууд инновацын экосистемийн орчныг сайжруулах, шинжлэх ухааны эрх зүйн байдлын тухай хууль болон холбогдох бодлогын баримт бичгийн хэрэгжилт, цаашдын уялдаа холбооны талаар дэлгэрэнгүй ярилцав.
С.Цэнгүүн гишүүн хэлэхдээ: Шинжлэх ухааны парк нь мэдлэг, судалгаа, инновацыг бодит эдийн засагт холбох гол гүүр болох боломжтой юм. Иймд бүтээлч орчныг төр бодлогын түвшинд бүх талаар дэмжих шаардлагатай талаар санал солилцлоо.
Паркийн зүгээс инновацын стартапуудыг дэмжих, технологи дамжуулах үйл ажиллагааг өргөжүүлэх, судалгааны үр дүнг үйлдвэрлэлд нэвтрүүлэх чиглэлээр хэрэгжүүлж буй төслүүд, хөтөлбөрүүдийн талаар танилцууллаа.
Мөн хоёр тал цаашид шинжлэх ухаан-бизнесийн уялдаа холбоог гүнзгийрүүлэх, инновацын экосистемийн эрх зүйн орчныг боловсронгуй болгох чиглэлээр хамтран ажиллахаа илэрхийлэв.
Шинжлэх ухааны паркийн захиргаа нь үндэсний инновацын тогтолцоог хөгжүүлэх, шинжлэх ухааны мэдлэгийг эдийн засгийн өсөлтийн түлхүүр болгон ашиглах зорилгоор үйл ажиллагаагаа тасралтгүй өргөжүүлж байна.